-
Trátase dunha proposta gratuíta que pon a proba a orientación e os coñecementos dos participantes //
-
Poden participar de balde equipos de entre 2 e 6 persoas maiores de 8 anos //
-
Fomenta o espíritu de equipo, a práctica de exercicio ao aire libre e o coñecemento das paraxes do municipio //
Tralo éxito das pasadas edicións, o Concello do Pino abre o prazo de inscrición para a IV O Pino Aventura, unha actividade que pon a proba o sentido de orientación e os coñecementos dos participantes coa idea de fomentar o espírito de equipo, a práctica de exercicio ao aire libre e a promoción das paraxes do municipio. Esta proposta, deseñada para adultos e rapazada a partir de 8 anos, está organizada polo Concello do Pino en colaboración con Territorio Comanche, a Xunta de Galicia e a Deputación da Coruña.
A cuarta edición de O Pino Aventura desenvolverase o sábado 31 de maio e se iniciará ás 11.00 horas no campo das festas de San Miguel de Pereira. As persoas participantes, organizadas en grupos de entre 2 e 6 persoas, deberán seguir un percorrido orientándose coa axuda dun mapa para ir atopando, e resolvendo, diversas probas físicas, de lóxica e de coñecemento. Cada proba superada permitirá gañar unha determinada puntuación; proclamarase campión o equipo que consiga o máximo número de puntos dentro do tempo establecido como límite.
O Pino Aventura contempla dúas categorías: Pequen@s Piñeir@s, reservada para os grupos nos que haxa, polo menos, un menor de 12 anos; e Explorador@s Piñeir@s para os equipos nos que todos os seus membros sexan maiores desa idade.
A participación é gratuíta. As persoas interesadas deberán cubrir o formulario de inscrición e presentalo por sede electrónica (opino.sedeelectronica.gal) ou presencialmente no rexistro xeral do Concello. A data límite é o mercores 28 de maio. O formulario pódese cubrir e descargar nesta ligazón. Para calquera dúbida, pódese chamar ao teléfono 981 51 10 65 ou enviar un correo electrónico a cultura@opino.gal.
É importante lembrar que cada equipo deberá proporcionar os seguintes datos: nome do equipo, teléfono de contacto e nome completo con data de nacemento de cada integrante. No caso de menores de idade, será necesaria unha autorización do pai, nai ou titor/a.
O Pino Aventura é unha proposta organizada polo Concello do Pino en colaboración con Territorio Comanche, a Xunta de Galicia e a Deputación da Coruña.
