O Pleno da Corporación ratificou a proposta da mesa de contratación cos votos a favor do PP e a abstención de PSdeG e BNG ||
A empresa O Espertar Servicios Sociales foi a que presentou a mellor oferta e seguirá sendo a responsable do SAF do Pino ||
A empresa O Espertar Servicios Sociales SL seguirá prestando o Servizo de Axuda no Fogar ao ser a gañadora do proceso de licitación deste servizo. O Pleno da Corporación aprobou hoxe a proposta da mesa de contratación, que considerou a oferta da empresa de Boimorto a máis beneficiosa. O Concello do Pino reserva unha partida de 488.812,21 euros para as 21.898 horas anuais de servizo que deberá atender a empresa de Boimorto durante o ano de contrato.
A proposta da mesa de contratación considerou a oferta de O Espertar Servicios Sociales SL (que xa está prestando o servizo actualmente no Pino) como a máis vantaxosa para o Concello, tanto polo número de horas (21.898 horas anuais) como polo importe económico. O Pleno ratificou esta proposta, e adxudicoulle á empresa de Boimorto o contrato, cos votos a favor do PP (6) e a abstención de PSdeG (3) e BNG (1).
Os prezos ofertados pola empresa de Boimorto son os seguintes, en función do coste hora. Dependencia días hábiles e sábado 20,28 euros (IVE incluído) e domingos e festivos, 20,80 euros. Para libre concorrencia o prezo hora ofertado é de 21,45 euros (con IVE). Como mellores en subministro de axudas técnicas presentou 2 lavacabezas de cama, 4 camas articuladas, 2 colchóns antiescaras, 6 cadeiras de rodas, 4 asentos de ducha e baño, 3 andadores e 4 grúas de mobilización. En canto aos servizos complementarios anuais comprométese a ofrecer 6 servizos de podoloxía, 6 de salón de peiteado, 8 de terapia e 5 de limpezas de coche. Todas elas gratuítas para o Concello.
Este ano, na licitación do SAF, o Concello incrementou en máis de 4.000 o número de horas de atención do Servizo de Axuda no Fogar, pasando das 17.448 horas anuais que se veñen prestando ata o de agora ata as 21.989 horas ao ano que deberá prestar a empresa adxudicataria a partir de agora, o que permitirá eliminar a lista de agarda.
No debate, o alcalde resaltou que a este concurso por procedemento aberto se presentaran 13 empresas, das que 2 quedaron excluídas ao non superar a puntuación mínima establecida nas bases. Un feito que, para Taboada, “demostra que os prezos que ofertamos non eran tan baixos, senón non habería tantas empresas interesadas en asumilo, e fixo mención ás melloras que propón a empresa adxudicataria. Así mesmo, recordou que no Concello non hai queixas nin dos usuarios nin das traballadoras, polo que entende que o servizo que se está prestando é de calidade.
Pola súa banda, o grupo socialistas argumentou a súa abstención ao considerar que o servizo debería ser público, prestado polo concello.
