O equipo de goberno de O Pino vai levar unha proposta ao pleno ordinario que se celebrará o martes para destinar ata 100.000 euros para axudas directas aos traballodores autónomos ou pequenas empresas con menos de 10 traballadores que tiveran que pechar os seus negocios polo decreto de estado de alarma do 14 de marzo debido a pandemia da covid-19.
Para destinar esta axuda a paliar as perdas económicas provocadas pola covid-19 no pequeno comercio e entre os autónomos do Pino, o equipo de goberno propón aprobar unha ordenanza que permitirá destinar un máximo de 1.200 euros a cada traballador con licencia de actividade que se vise obrigado a pechar o seu negocio.
Esta medida para reactivar a economía local está destinada ás persoas autónomas empadroadas no municipio, que poderán recibir un máximo de 1.200 euros de axuda. A proposta contempla axuda de 600 euros (200 euros mensuais durante tres meses) para compensar o custo do aluguer, e outros 600 euros (200 mensuais durante tres meses) para pagar a cota de afiliación a Seguridade Social.
As pequenas empresas ou sociedades con formas xurídicas na que participen varios autómomos, só poderán recibir unha axuda. O mesmo ocorre no caso daqueles traballadores que teñan alugados varios locais, que só poderán recibir unha axuda.
Segundo estimacións do alcalde, Manuel Taboada, esta medida pode beneficiar a un cento de traballadores autónomos e pequenos empresarios do municipio.
