‘Non esperes o susto: controla a túa tensión’ terá lugar o venres 16 de maio en Lardeiros con entrada libre ||
O Concello do Pino impulsa unha nova acción de concienciación en materia de saúde coa organización dunha charla informativa sobre hipertensión arterial. A actividade celebrarase o venres 16 de maio ás 17:30 horas en Lardeiros, nas inmediacións da Casa do Maior, e terá entrada de balde para todas as persoas interesadas.
Baixo o título Non esperes o susto: controla a túa tensión, o encontro busca ofrecer pautas claras e prácticas sobre como previr e manexar esta enfermidade silenciosa que afecta a unha parte importante da poboación. A charla estará impartida por Alberto Salmonte Rodríguez, enfermeiro do centro médico do Pino, quen explicará que é realmente a hipertensión, desmontará mitos habituais, ensinará a tomar correctamente a tensión arterial e achegará consellos sobre alimentación e hábitos de vida saudables.
Esta acción forma parte dun compromiso continuado do Concello do Pino coa promoción da saúde e o benestar da veciñanza, especialmente no ámbito da prevención e da información accesible. A charla está pensada para persoas de todas as idades que queiran coidar a súa saúde cardiovascular dun xeito sinxelo, práctico e con rigor profesional.
