O alcalde do Pino, Manuel Taboada, mantivo unha reunión de traballo coa delegada territorial da Xunta en Santiago, Belén do Campo, na que lle trasladou a necesidade de crear unha nova parada de autobús na contorna das estradas N-634 e N-547, en ambas as direccións, para dar servizo aos veciños e veciñas de Santiso e Castrofeito.
Esta nova infraestrutura vén cubrir a ausencia de paradas tras a eliminación das existentes pola construción da nova autovía. A Xunta comprometeuse a acelerar os trámites necesarios para que a parada sexa unha realidade canto antes e asumirá o custo da súa instalación, ao contar xa coa autorización do titular das dúas vías.
Na xuntanza, que tivo lugar o pasado 30 de abril, tamén se abordaron outras posibles vías de colaboración entre ambas as administracións para dar resposta ás necesidades do municipio.
