- “A violencia machista parámola entre todos e todas. Actúa. Non cales” é a contundente frase coa que o alcalde pecha a gravación
- Un manifesto institucional reitera o compromiso municipal coa igualdade e a construción dunha sociedade máis xusta
- A tradicional andaina solidaria terá lugar o sábado na área recreativa da Magdalena
“No Concello do Pino, á violencia machista parámola entre todos e todas. Actúa. Non cales. Dille non á violencia de xénero”. Esta frase contundente do alcalde, Manuel Taboada, serve como colofón para o vídeo institucional co que o Concello do Pino conmemora este 25 de novembro, Día Internacional contra a Violencia de Xénero, convidando a toda a veciñanza a tomar partido e poñerlle freo ás agresións machistas.
Por un lado, identificar actitudes vencelladas á violencia de xénero; polo outro, instigar á cidadanía a denunciar as agresións e, por último, apoiar as vítimas son os tres piares de actuación que o Concello considera fundamentais e por iso incide neles neste vídeo, no que poidemos escoitar afirmacións como “Non deixes que te ridiculice, que te controle, que te aparte das túas amizades”, “Ante o maltrato hai que tomar partido. Non sexas cómplice” ou “Calquera momento é bo para dicir basta”.
Concelleiras da Corporación, a directora e un profesor do colexio CPI Camiño de Santiago, a presidenta da ANPA, unha doutora e un doutor do centro de saúde, o presidente da SD O Pino e empregados municipais diríxense a toda a veciñanza para deixar constancia de que a violencia de xénero non é un problema individual, senón que nos atinxe a todos e todas como sociedade.
A responsabilidade que temos cada un de nós de facerlle fronte ás agresións machistas é tamén a finalidade do manifesto institucional (preme aquí para lelo) publicado polo Concello do Pino co gallo do 25 N. “Debemos impedir os intentos de xustificar, minimizar, banalizar ou ocultar a violencia de xénero, ademais de denunciar calquera tipo de maltrato cara a muller e visibilizar uns agresores que non nos representan na construción da sociedade que queremos, asentada sobre os principios de liberdade, de xustiza e de equidade”, sinala o texto.
A declaración municipal reitera o compromiso do Concello do Pino para actuar fronte á violencia de xénero e loitar a prol da igualdade, coa fin última de lograr que “cada persoa posúa os mesmos dereitos e oportunidades, e poida aportar o seu valor ao conxunto dende a liberdade e a dignidade”.
No marco dos actos do 25N, o Concello organiza asimesmo a tradicional andaina solidaria pola igualdade que nesta ocasión terá lugar o vindeiro sábado 28 de novembro a partir das 16:00 horas pola contorna da área recreativa da Magdalena, en Castrofeito.
Curso de defensa persoal
Por último, a través de Facebook, a veciñanza poderá seguir os tres vídeos dun curso de defensa persoal destinado ás mulleres e que tivo que pasar ao formato virtual por causa das restricións establecidas pola pandemia de covid-19. A primeira clase estará dispoñible a partir deste mércores 25.
