O acto estivo presidido pola concelleira de Cultura Eva Varela e contou coa asistencia do alcalde Manuel Taboada ||
A presentación comezou cunha mesa redonda na que participaron a xornalista María José Gómez Barreiro e Alicia Beatriz López Gallego, antiga mestra da autora nun obradoiro de escritura creativa ||
O auditorio municipal do Pino acolleu este domingo, 4 de maio, a presentación do primeiro libro da veciña Carmiña Carrillo Vaamonde, titulado Mil escritos desordenadamente ordenados. O acto, presidido pola concelleira de Cultura Eva Varela e ao que tamén asistiu o alcalde, Manuel Taboada, reuniu a máis dun cento de persoas que quixeron acompañar a autora neste emotivo debut literario.
A obra de Carmiña Carrillo recolle unha coidada selección de relatos, poesías, fotografías e debuxos, nos que a autora expresa a súa visión persoal sobre a vida, a familia e as emocións. Un dos textos está especialmente dedicado ao seu pai, cunha mensaxe cargada de agarimo e homenaxe.
A presentación comezou cunha mesa redonda na que participaron, ademais da autora e da concelleira de Cultura, a xornalista María José Gómez Barreiro e Alicia Beatriz López Gallego, antiga mestra de Carmiña Carrillo nun obradoiro de escritura creativa. Ambas compartiron reflexións sobre o proceso de creación literaria e o valor da expresión artística.
A xornada rematou cunha sesión de sinaturas, na que Carmiña Carrillo asinou exemplares do seu libro ás persoas asistentes.
O Concello do Pino salienta o compromiso coa promoción cultural e co apoio a iniciativas literarias que nacen do propio municipio.
