O Concello do Pino vén de convocar o XXI Concurso de Carteis de Entroido, no que se buscan as mellores ilustracións para anunciar estes festexos por todo o municipio. O certame vai dirixido a nenos e nenas de 3 a 17 anos empadroados no Concello, repartidos en catro categorías segundo a idade. Se ben o premio principal será ver os traballos elixidos impresos no cartel anunciador do Entroido, os gañadores de cada categoría recibirán tamén un agasallo.
As categorías establecidas para este concurso son catro: de 3 a 5 anos, de 6 a 8, de 9 a 11 e de 12 a 17 anos. Tamén é posible participar de forma grupal, por aulas.
Canto ás características técnicas dos traballos, os debuxos deben ser en formato A4 e levar nalgún sitio a lenda “O Pino, Entroido 2020”. No reverso indicarán o nome do autor, idade e teléfono de contacto. Os premios serán entregados no transcurso da gala de Disfraces de Entroido que o Concello vai celebrar o domingo 23 de febreiro.
O prazo para poder participar no concurso será ata o venres 31 de xaneiro. Os traballos poden entregarse no CPI Camiño de Santiago, no centro sociocultural Luís Seoane e na Casa do Concello.
