Este Nadal chegou aos fogares do Pino o último número da revista Faísca, na que se recolle toda a información da actividade municipal ao longo do presente ano.
Unha foto da área recreativa da Madalena ocupa a portada desde número 12 da revista, que se fai eco no seu interior do ascenso da SD O Pino a Rexional Preferente, dos investimentos por máis dun millón de euros en obras viarias realizadas nas parroquias, ou das iniciativas levadas a cabo ao longo de 2020 contra a violencia de xénero.
A actividade de empresas de referencia, como Tartas La Abuela ou a Queixería Tradicional Ruta Xacobea; o Servizo de Axuda no Fogar; ou as actividades culturais, con especial mención para o concerto que ofreceron no Luís Seoane as pianistas residentes no municipio Marina Fernández e Ilona Timchenko, son outras das temáticas que salienta Faísca nesta última edición. Tamén se destacan as fermosas paraxes naturais coas que conta o municipio.
A revista pode consultarse en PDF premendo nesta ligazón.
