O alcalde de O Pino, Manuel Taboada Vigo, recoméndalle á veciñas e veciños quedar na casa e seguir as recomendacións das autoridades sanitarias para loitar contra o Covid-19. “Todos xuntos venceremos a este coronavirus, que non vai poder con nós”, lles recorda o alcalde nunha mensaxe publicada na web municipal e difundida polas redes sociais do Concello.
Manuel Taboada pídelle á veciñanza que fagan caso e sigan as recomendacións das autoridades sanitaria para evitar a propagación da pandemia pola que se decretou o estado de alarma en toda España. “Son momentos duros e difíciles, pero temos que facer un esforzo. Quédate na casa”, dille o alcalde.
Na súa mensaxe, Taboada recorda que dende o departamento de Servizos Sociais do Concello de O Pino están a contactar coas persoas máis vulnerables, persoas maiores, que poidan ter necesidades, para coñecer a súa situación. Esta semana O Pino comezou, en colaboración co Banco de Alimentos Rías Altas, a facer o reparto de alimentos ás familias con menos recursos, e a desinfectar aquelas zonas máis concorridas pola veciñanza, como o exterior do centro médico, farmacias, supermercados ou tendas, e tamén os contedores do lixo.
Taboada Vigo pídelle a “as persoas que poidan ter algún tipo de necesidade” que chamen aos Servizos Sociais, ao teléfono 981 51 10 02, para que “dende o Concello lle poidamos axudar, dentro das nosas posibilidades, levándolle medicinas ou alimentos, ou contactando con supermercados para que lles poidan achegar a súa casa”. E conclúe recordando o importante que é quedar na casa nestes intres.
