- O Concello agasallounos cunhas bolsas conmemorativas, uns libros, un debuxo e un conto para compartir coa familia ||
O Concello de O Pino conmemorou hoxe o Día de Rosalía co alumnado da escola unitaria de Gonzar, que participou activamente nun xogo de pistas baseado na vida e obra da escritora galega máis universal.
A responsable da biblioteca municipal, Ana Vigo, resumiulles os aspectos máis importantes da vida de Rosalía, e facilitáballe pistas para atopar diferentes obxectos relacionados coa escritora que a concelleira de Cultura, Eva Varela, agochaba en diferentes lugares.
A mañá resultou moi entretida para as nenas e nenos que hoxe acudiron á escola, que gozaron participando neste xogo, mentres coñecían algo máis da vida e obra de Rosalía de Castro.
Ademais de poder ver unha escolma de libros de Rosalía, nenas e nenos levaron como recordo para a súas casas unha bolsa conmemorativa coa imaxe de Rosalía de Castro. No seu interior unha reprodución do conto coa vida da poeta para compartir coa familia, un debuxo para colorear e unha bolsa de lambonadas, entre outras sorpresas.
Ao rematar o xogo, os nove nenos e nenas que hoxe acudiron á clase animaron a toda a veciñanza a celebrar o 23 de febreiro co berro “Feliz día de Rosalía”.
