-
A actividade vai dirixida a persoas a partir de 8 anos que deberán formar equipos de entre 2 e 5 membros ||
-
A proposta, organizada polo Concello en colaboración con Territorio Comanche e a Xunta, quere fomentar o xogo en equipo, o exercicio, a agudeza mental e o coñecemento do territorio ||
-
En dúas horas e media os participantes deberán superar diversas probas e orientarse cun mapa para acadar o maior número de puntos posible ||
-
A data límite para anotarse remata o mércores 19 de maio ás 13.00 horas||
A Concellaría de Cultura vén de abrir o prazo de inscrición para participar na segunda edición do Pino-Aventura. A actividade vai destinada a persoas a partir de 8 anos e ten por finalidade fomentar o xogo en equipo, exercicio, a agudeza mental e o coñecemento do territorio. Celebrarase o sábado 20 de maio e este ano terá por escenario a contorna da área recreativa da Tarroeira. A proposta está organizada polo Concello do Pino, en colaboración coa empresa Territorio Comanche e a Xunta de Galicia.
As persoas participantes deberán formar equipos de entre 2 e 5 persoas para superar diversas probas (físicas ou de coñecemento), orientarse cun mapa e percorrer a contorna para localizar unha serie de puntos de control ou balizas. Nun máximo de dúas horas e media os equipos participantes deberán conseguir o maior número de puntos posibles. Cada equipo decide libremente a orde de busca e o ritmo a seguir. Trátase dun xogo estratéxico no que a toma de decisións e, sobre todo, o traballo en equipo son fundamentais para acadar o éxito.
A data límite para inscribirse no Pino-Aventura rematará o venres 19 de maio, ás 13.00 horas. As persoas interesadas poderán anotarse de xeito presencial na Casa da Cultura, por teléfono (chamando ao 981 511 065) ou enviando un correo electrónico ao enderezo cultura@opino.gal.
Para anotarse nesta actividade é necesario facilitar os seguintes datos: nome do equipo, teléfono de contacto, nome completo e data de nacemento de cada un dos integrantes. Os menores de 12 anos deberán aportar tamén unha autorización da nai, pai ou titor.
Pino-Aventura contempla dúas categorías: Pequen@s Piñeir@s, reservada para os grupos no que haxa, polo menos, un menor de 12 anos; e Explorador@s Piñeir@s para os equipos nos que todos os seus membros sexan maiores desa idade.
Antes de empezar a proba, a organización facilitaralle a cada grupo un mapa (con toda a información necesaria para orientarse); unha folla de descrición das balizas (as zonas de control) e dos puntos que vale cada unha. Un tríptico, no que cada equipo deberá apuntar as respostas das probas de coñecemento e o seu paso polas balizas, e un bolígrafo completarán o material necesario para participar. Os equipos participantes en Pino-Aventura iniciarán a proba ás 10.30 horas na área recreativa da Tarroeira.
Cada equipo deberá levar polo menos un teléfono móbil, para estar sempre localizado, auga, roupa e calzado cómodo para andar ou correr.
Ao rematar a proba haberá un punto de avituallamento para que as persoas participantes poidan repoñer forzas.
Escape room para o alumnado da ESO
Por outra banda, o alumnado da ESO do CPI Camiño de Santiago participará o 19 de maio nun escape room organizado pola Concellaría de Cultura, que ten por obxectivo resaltar o potencial cultural e turístico das tradicións galegas máis ancestrais. Mitos, lendas, costumes ancestrais, tradicións ou supersticións serán algúns dos elementos cos que se atopará o alumnado que participe no escape room que vai desenvolver Territorio Comanche en colaboración coa Xunta de Galicia
Neste escape room, de algo máis de hora e media de duración, as persoas participantes, agrupadas por equipos, recibirán unha charla técnica de quince minutos e logo terán unha hora para atopar as pistas que lles permita ir superando as diferentes probas e coñecer algo máis sobre o lobishome, os biosbardos, as meigas, a Santa Compaña, Santo André de Teixido ou a catedral de Santiago, entre outros. Haberá despois unha terceira fase, na que os equipos deberán responder a unha rolda de preguntas para reforzar os contidos traballadores durante o escape room.
Os dous equipos que acaden unha maior puntuación nestas dúas fases deberán competir entre si nunha proba final chamada A pirámide para decidir cal é o gañador.
Atoparás a folla de incrición no documento adxunto:
