A conselleira resaltou na súa mensaxe o traballo e a posta en valor do papel das mulleres galegas “e a súa contribución a construír unha Galicia mellor” ||
Comercios do municipio recibiron tamén material da campaña ‘O Pino cara a Igualdade’, que se mantén activa ata o sábado día 12 ||
Presentouse o III Plan de igualdade de oportunidades e distribuíuse material de sensibilización entre o alumnado do CPI ||
A conselleira de Infraestruturas, Ethel Vázquez, foi a primeira en asinar no Libro da Muller, que forma parte das iniciativas que puxo en marcha o Concello de O Pino para conmemorar o Día Internacional da Muller, e que tamén inclúe a presentación do III Plan de Igualdade de oportunidades e a campaña de sensibilización no comercio local O Pino cara a Igualdade.
Durante a súa visita ao Concello para presentar o proxecto de construción da nova depuradora de Arca, Ethel Vázquez deixou escrito no Libro da Muller: “No Día Internacional da Muller, baixo o lema Avanza con elas, visitamos o Concello de O Pino para presentar o proxecto de saneamento na parroquia de Arca, polo tanto, traballando e poñendo en valor o papel das mulleres galegas e a súa contribución a construír unha Galicia mellor”.
Todas as persoas que desexen deixar reflexadas as súas opinións ou reflexións neste libro, pódense achegar ata as oficinas municipais e escribir nel a súa mensaxe. Traballadoras municipais deixaron xa a súa mensaxe escrita neste libro, ademais de facerse unha foto diante do expositor.
Ademais do libro, hoxe presentouse tamén o III Plan de Igualdade de oportunidades entre mulleres e homes 2021-2025, unha ferramenta que lle permitirá ao Concello de O Pino seguir a traballar “nas transformacións precisas para garantir o principio de equidade, situado no III Plan de Igualdade, como unha ferramenta de traballo mediante a cal integrar a perspectiva de xénero nas políticas e accións, a través de materialización das diferentes áreas estratéxicas formuladas, que se entrelazan coa pretensión de avanzar na construción dunha sociedade que se asente sobre os piares da xustiza, diversidade e igualdade”, como reflexa o alcalde, Manuel Taboada Vigo na presentación do plan.
Estes foron dous dos apartados mencionados polo alcalde durante a lectura do Manifesto institucional con motivo do Día Internacional da Muller, e no que se recoñece á violencia de xénero como “unha violación clara dos dereitos humanos e que esixe unha abordaxe global e o compromiso de todas e todos para a erradicación da mesma”.
Outras das accións levadas a cabo estes días e a campaña comercial O Pino cara a Igualdade, coa que se distribuíu material de sensibilización entre os establecementos comerciais. Distribuíronse banners, alfombras, chapas, adhesivos para concienciar e visibilizar a toda a poboación. O alcalde recorda que os locais comerciais do municipio que o precisen teñen a súa disposición nas oficinas municipais máis material desta campaña, que durará ata o vindeiro sábado, 12 de marzo.
Durante a lectura do manifesto, Manuel Taboada recordou que o Concello, a demais das xa mencionadas, ten en marcha programas e actividades, como a escola de verán, que permiten a conciliación laboral e familiar ou a realización de diferentes dinámicas destinadas á poboación infantil e xuvenil que permiten traballar coa educación en valores. Precisamente para fomentar esta sensibilización, o Concello entregou hoxe entre o alumnado do CPI Camiño de Santiago diferente material.
A programación do Concello de O Pino polo 8M conta con financiamento a cargo do Ministerio de Igualdade, Secretaría de Estado e Igualdade e Contra a Violencia de Xénero.
Manifesto íntegro do 8M
Reproducimos íntegro o manifesto lido polo alcalde de O Pino, Manuel Taboada, con motivo do Día Internacional da Muller:
O día 8 de marzo, conmemórase a loita feminina pola súa participación na sociedade, nas mesmas condicións de igualdade que o home, creo que non hai que esquecer que centos de mulleres que, ao longo da historia, reivindicaron o seu dereito ao voto, a igualdade nas condicións laborais e, en xeral, a plena igualdade entre sexos. E grazas a elas faise uso de moitos dos dereitos cuxo exercicio estaba reservado aos homes. Os dereitos que hoxe exercitan as mulleres son a consecuencia das loitas do onte.
A loita pola igualdade, como dicía, vai dando os seus logros, o nivel de equidade alcanzado ao longo dos anos, non creo que o soñasen estas mulleres, aínda así temos que ser conscientes que a pesar destes avances, a discriminación segue sendo un fenómeno presente na nosa sociedade que hai que erradicar, porque aínda que todas e todos somos iguais ante a lei sabemos que a realidade é ben distinta, xa que en moitas ocasións se invisibiliza e aínda hai moito camiño que percorrer.
Estes pequenos cambios, enfocados á construción dunha sociedade xusta e igualitaria, e que os dereitos das mulleres estean garantidos, tradúcense en diferentes programas que se están e van desenvolver ao longo do ano. Actividades como a escola de verán, que permite a conciliación laboral e familiar ou a realización de diferentes dinámicas e contacontos destinados á poboación infantil e xuvenil que admiten traballar coa educación en valores.
Traballamos tamén, un tema que é unha das consecuencias máis graves da desigualdade entre homes e mulleres como é a violencia de xénero, xa que debe de ser entendida como unha violación clara dos dereitos humanos e que esixe unha abordaxe global e o compromiso de todas e todos para a erradicación do mesmo.
Hoxe atopámonos aquí para, ademais de conmemorar o día Internacional da Muller, presentar a programación que temos desde o Concello para desenvolver ao longo dos próximos meses, programación que pretende dar formación, información e visibilidade sobre temas tan importantes como a igualdade.
O primeiro paso e presentar o III Plan de Igualdade de oportunidades entre mulleres e homes que será o eixo condutor para os próximos 4 anos.
Tamén queremos por a disposición de toda a poboación o libro da muller, onde as/os que queiran poderán expresar a súa visión acerca da igualdade de oportunidades. Tamén poderanse facer reseñas sobre mulleres pioneiras (destacando as mulleres do concello de O Pino).
Outra medida é a campaña co comercio local “O Pino cara a Igualdade” que presentamos hoxe e durara hasta o próximo día 12, a través da repartición de materiais barners, alfombra, chapas, adhesivos….. para concienciar e visibilizar.
Antes de acabar , dicir que temos intención de seguir a traballar nestas liña para que algún día nestas mesmas datas non esteamos a reivindicar os dereitos dás mulleres, se non que esteamos a celebrar unha festa por que por fin logramos os nosos obxectivos.
