O Concello de O Pino fai pública unha declaración institucional con motivo da celebración do Día Internacional contra a Violencia de Xénero, que reproducimos a continuación:
A violencia contra a muller maniféstase como o símbolo máis tanxible da desigualdade existente nos nosos días, atenta contra os dereitos elementais das persoas e constitúe unha violación dos dereitos humanos, impedindo que a nosa sociedade continúe avanzando polo sendeiro da democracia. Polo tanto, é preciso camiñar cara unha sociedade que respecte os dereitos de mulleres e homes, que os trate por igual con independencia do xénero e que non entenda nin admita discriminación algunha; en definitiva, unha sociedade de persoas libres.
Ninguén pode, polo tanto, manterse á marxe da loita contra a violencia machista. Falamos de accións que non só descualifican a quen as realiza senon tamén a quen as tolera e, por iso, a nosa resposta ante elas ten que ser global e contundente: debemos impedir os intentos de xustificar, minimizar, banalizar ou ocultar a violencia de xénero, ademais de denunciar calquera tipo de maltrato cara a muller e visibilizar uns agresores que non nos representan na construcción da sociedade que queremos, asentada sobre os principios de liberdade, de xustiza e de equidade.
O Concello de O Pino, como institución que representa o conxunto da cidadanía, comprométese a seguir traballando na posta en marcha de iniciativas dirixidas a sensibilizar sobre a realidade da violencia exercida contra as mulleres e os menores, a previr as situacións da vida local que poidan propicialas, así como a intervir sobre as súas manifestacións, convidando á poboación a que tome conciencia da magnitude deste problema e as consecuencias que ten para mulleres, fillos, fillas, familias e sociedade no seu conxunto.
En definitiva, o concello de O Pino recoñece a igualdade como un valor imprescindible para o progreso e avance de toda sociedade, xa que ofrece a posibilidade de que cada persoa posúa os mesmos dereitos e oportunidades, e poida aportar o seu valor ao conxunto dende a liberdade e a dignidade.
