-
Unha unidade móbil instalarase diante do centro de saúde os días 8,9 e 10 de febreiro //
-
É preciso solicitar cita previa nos teléfonos 622 748 283 ou 623 546 992 //
-
Haberá unha charla sobre podoloxía o 8 de febreiro, na Casa da Cultura //
Coidados porta a porta, o programa da Xunta de Galicia que presta atención ás persoas maiores de 55 anos do rural co fin de previr a dependencia, prestará os seus servizos en Rois o vindeiro mes de febreiro. Unha unidade móbil estacionará diante do centro de saúde os días 8, 9 e 10 de febreiro.
O programa ofertará novamente tres tipos de servizos: estimulación da memoria, podoloxía e audioloxía. Ademais, desta volta, impartirase tamén unha charla sobre podoloxía. Será o mércores 8 de febreiro, ás 13.00 horas, na Casa da Cultura.
Para poder gozar destes servizos, as persoas maiores de 55 anos que estean interesadas deberán concertar cita previa chamando aos teléfonos 622 748 283 ou 623 546 992. Tamén poderán concertar cita e o/ou obter máis información no enderezo electrónico coidadosportaaporta.politicasocial@xunta.gal
Lembrar que a actuación no ámbito da estimulación da memoria busca retrasar e aminorar o proceso de deterioro cognitivo e céntrase nos ámbitos cognitivo e funcional vencellándoos a hábitos de vida saudables e da promoción do envellecemento activo como xeito de evitar a dependencia.
No servizo de podoloxía, os profesionais valorarán o estado xeral do pé das persoas usuarias, ademais de cortarlles as unllas e eliminar as durezas, calosidades e helomas. E, as persoas maiores tamén poderán someterse a unha exploración gratuíta do oído para comparar os seus niveis de audición e frear a perda auditiva.
