Cincuenta e dous veciños e veciñas do Pino empezaron fixeron esta mañá o tramo entre A Mota (Arzúa) e Castrofeito (O Pino) percorrendo así a segunda etapa desta edición de Camiña e Descubre, coa que a Concellería de Cultura quere poñer en valor o Camiño do Norte.
A primeira etapa celebrouse o 10 de outubro, entre Sobrado dos Monxes e A Mota. A última, para chegar a Santiago, será o terceiro sábado de decembro (día 15). A xornada de hoxe rematou cun xantar de confraternidade no restaurante Bello de Castrofeito.
Para anotarse na actividade Camiña e Descubre hai que reservar praza chamando ao 981 511 065 ou enviando un correo a cultura@opino.gal. O prezo é de 8€ por persoa. As andainas celébranse o terceiro sábado de cada mes, aínda que as datas poden sufrir cambios.
Camiña e Descubre comezou hai xa un lustro coa intención de dar a coñecer as diferentes Rutas Xacobeas, percorrendo en cada xornada unha media de 20 quilómetros para compartir experiencias e bos momentos. Moitos dos participantes levan formando parte da acción desde o principio, aínda que o grupo se renova e medra con cada convocatoria.
