O alcalde e a concelleira de Servizos Sociais entregáronlle unha placa e un ramo de flores ||
A familia reuniuse nunha festa na casa de Gonzar para celebrar a efeméride ||
O Concello de O Pino conta dende o pasado xoves cunha nova centenaria. Carmen Galloso Rivadulla celebrou o seu aniversario rodeada da familia na casa do Vilar, en Gonzar, ata onde se achegaron o alcalde e a concelleira de Servizos Sociais para facerlle entrega dunha placa conmemorativa e dun ramo de rosas.
Natural da parroquia de Buazo (Boimorto), Carmen Galloso chegou ao Pino cando tiña quince anos e traballou na agricultura toda a súa vida. Ata non hai moito era frecuente vela dando longos paseos acompañada da súa neta Pilar. “Os últimos anos pasa a mañá sentada detrás da cociña”, indica a súa filla Matilde, e o seu xenro Suso, cos que vive no Vilar, na parroquia de Gonzar.
Ata a casa familiar desprazáronse o sábado as súas fillas Luisa e Dolores, xunto cos 4 netos e 3 bisnetos e o resto da familia para participar na festa coa que celebraron a efeméride.
