O programa do IV Ciclo da USC para maiores de 50 anos clausurouse onte en Santiago //
A concelleira de Servizos Sociais, Mercedes Vázquez, foi a encargada de recoller os correspondentes diplomas //
O Salón Noble do Colexio de Fonseca, en Santiago, acolleu onte a clausura do programa do IV Ciclo da Universidade de Santiago de Compostela Camiños de Coñecemento e Experiencia no que participaron un total de 14 alumnos e alumnas do Pino maiores de 50 anos. A encargada de recoller os diplomas do alumnado do Pino participante nesta acción formativa foi a concelleira de Servizos Sociais, Mercedes Vázquez Rodeiro.
O acto contou coa participación e intervencións da vicerreitora de Estudantes e Cultura, Pilar Murias Fernández; da directora do Programa Universitario de Maiores-IV Ciclo, Mª Esther Olveira Olveira; e o subdirector xeral de Planificación, Sistemas de Información, Calidade, Humanización e Innovación Asistencial da Xunta de Galicia, Javier Ventoso Rial.
Ademais da entrega de diplomas, Laura Touriñán Morandeira, investigadora posdoutoral Margarita Salas, pronunciou a lección maxistral, e tamén interveu Beatriz Rosende, unha das alumnas do programa. O acto rematou coa actuación da tuna.
Camiños de Coñecemento e Experiencia é un programa promovido pola USC ao abeiro do IV Ciclo que se desenvolveu nos meses de marzo a xuño deste ano. Trátase dunha iniciativa formativa dirixida a persoas maiores de 50 anos das comarcas da contorna de Santiago e da súa zona de influencia administrativa e sociocomunitaria. Ten por obxectivo favorecer a democratización do saber, potenciando e difundido o coñecemento científico e artístico na poboación maior de 50 anos que, por diferentes motivos, non pode participar nas actividades do programa do IV Ciclo.
