O programa Camiña e Descubre, co que o Concello do Pino anima á veciñanza a percorrer tramos do Camiño de Santiago unha vez ao mes ata completar toda a súa extensión, retoma a súa actividade o sábado 20 de outubro. Nesta quinta temporada da iniciativa cubrirase a última metade do Camiño do Norte.
Na edición de 2017, máis de 50 persoas andaron 140 dos 200 quilómetros de que consta este Camiño, comezando en Ribadeo. Este ano proseguirase pola variante da Mota, a antiga vía que unía o Mosteiro de Sobrado dos Monxes con Compostela e conflúe coa Vía Francesa en Lavacolla, seguindo o itinerario da vía romana XIX que conectaba Lucus Augusti e Iria Flavia. Este Camiño transcorre polo termo municipal do Pino polas parroquias de Santo Estevo de Medín, Santa María de Gonzar e Santa María de Castrofeito.
Para anotarse na actividade Camiña e Descubre hai que reservar praza chamando ao 981 511 065 ou enviando un correo a cultura@opino.gal. O prezo é de 8€ por persoa (pagarase por adiantado). As andainas celébranse o terceiro sábado de cada mes, aínda que as datas poden sufrir cambios.
Camiña e Descubre comezou hai xa un lustro coa intención de dar a coñecer as diferentes Rutas Xacobeas, percorrendo en cada xornada unha media de 20 quilómetros para compartir experiencias e bos momentos. Moitos dos participantes levan formando parte da acción desde o principio, aínda que o grupo se renova e medra con cada convocatoria.
