-
Durante os meses de xullo e agosto haberá actuacións familiares en diferentes lugares do concello ||
-
Antes de cada espectáculo haberá obradoiros, pintada de debuxos e máis actividades para os cativos ||
-
‘Unha armadura con ferruxe’ represéntase o día 9, ás 11.00 horas na carballeira de Gonzar ||
-
Recoméndase inscribirse antes do martes para poder controlar o aforo e o material necesario para todos os asistentes ||
O Concello de O Pino pon en marcha o vindeiro xoves unha nova iniciativa para promover espectáculos culturais polas parroquias do municipio, podendo achegar así actividades culturais á veciñanza respectando as medidas de prevención contra a covid-19. As Parolas de verán arrancan o xoves, día 9, ás 11.00 horas, na carballeira de Gonzar coa representación do espectáculo de monicreques ‘Unha armadura de ferruxe’.
Pequenos e grandes, nenas e nenos, avós e netos poderán gozar este verán de diferentes espectáculos e actividades que se irán repartindo todos os xoves de xullo e agosto por diferentes parroquias do municipio.
Antes de cada espectáculo ou actividade, dende a Concellaría de Cultura de O Pino desenvolveranse diferentes obradoiros, pintadas de debuxos e outras actividades para que os máis pequenos poidan gozar e desenvolver toda a súa imaxinación.
Para un maior control das medidas de seguridade e poder dispoñer do material necesario para os obradoiros e actividades, dende a Concellaría de Cultura solicítase a inscrición previa de todos aqueles que queiran participar. As familias interesadas pódense inscribir enviando un correo electrónico ao enderezo cultura@opino.gal ou ao teléfono 981 511 065 antes das 14.00 horas do martes anterior a cada espectáculo.
Nas Parolas de verán poden participar todos os nenos e nenas que queiran, aínda que non residan na parroquia onde se realice a actividade ou non estean empadroados no concello. Durante os espectáculos respectaranse as normas de seguridade establecidas polas autoridades competentes. Todos os asistentes deben acudir con máscara.
Programa para xullo.
Co espectáculo de monicreques ‘Unha armadura con ferruxe’ comezan as Parolas de verán o xoves 9 de xullo na carballeira de Gonzar, a partir das 11.00 horas.
A semana seguinte, o xoves 16, no centro sociocultural de Castrofeito representarase ‘A historia de Brancaflor’, unha trama chea de probas máxicas, encantamentos, romances e maleficios. Será tamén ás 11.00 horas.
‘Rogelio. Un payaso en recuperación’ é o espectáculo previsto para o xoves 23 de xullo.. Rogelio leva 20 anos encerrado na súa casa e para recibir a alta médica debe facer rir aos nenos. Dende a Concellaría de Cultura propóñense as parroquias de Cerceda, Cebreiro ou a de O Pino. O espectáculo vaise representar naquela parroquia na que haxa máis nenos e nenas inscritos antes do martes 21 de xullo.
Co divertivo espectáculo musical sobre a cociña e a comida ‘O capitán garfo’ rematarán as Parolas de verán no mes de xullo. Sería o día 30, tamén ás 11.00 horas, no centro sociocultural de Pereira.
O programa para o mes de agosto anunciarase nas vindeiras semanas.
