As Escolas Deportivas Municipais de O Pino comezan a súa actividade o vindeiro martes, 1 de outubro. Nesta temporada 2019/2020, a poboación menor de 16 anos contará cun amplo abano de actividades físicas para practicar ata o 31 de maio por un prezo de 40€/ano para os veciños do municipio. Canda ás actividades para nenos e nenas botan tamén a andar as propostas para público adulto, que se estenderán ata o mes de xuño. O prazo de inscrición, aberto o mércores 18 de setembro, finaliza o venres 11 de outubro.
As actividades levaranse a cabo en catro localizacións do termo municipal: os polideportivos de Reboredo e Lameiro, o Centro Sociocultural Luís Seoane e o CPI Camiño de Santiago. Haberá obradoiros para a primeira infancia, como é o caso dos de psicomotricidade, e tamén para nenos e nenas ata os 16 anos. As actividades propostas son baloncesto, atletismo, patinaxe artística, ximnasia rítmica, fútbol sala, baile moderno e bádminton.
No que toca á poboación adulta, a principal novidade neste curso é a actividade de GAP e circuítos de forza. Ademais, teñen continuidade os obradoiros de pilates, ioga, running, ximnasia de mantemento, tenis, zumba e aerobic/step.
Prezos
Para as Escolas Deportivas Municipais o Concello estableceu un prezo único de 40€/ano para os empadroados no Pino e 60€/ano para os non empadroados. As familias gozarán dun desconto non acumulable dun 50% no caso de se anotaren varios irmáns ou en varias actividades. Para os adultos, o custe é de 55€/ano para a veciñanza e 75€/ano para quen non estea empadroado, co mesmo 50% de desconto en caso de acudir a varios obradoiros.
As solicitudes poden descargarse na sección de formularios desta web ou recollerse na Casa do Concello. As inscricións deben presentarse no Rexistro Xeral municipal, xunto co xustificante de ingreso da cota correspondente de cada actividade e, se procede, do certificado de empadroamento. Para outras informacións cómpre dirixirse á concellería de Deportes no teléfono 981 511 002.
Tamén se poden consultar os horarios e descargar os formularios de inscrición e pagamento nos documentos adxuntos.
