O prazo para anotarse pecha mañá xoves día 21 de setembro ||
A participación pode formalizarse a través da web carreirasgalegas.com antes das 23.59 horas do día 21 ||
A proba chega este domingo a súa maioría de idade ||
Máis de 400 atletas participaron nas 7 categorías das que constaba a carreira popular, Os 8.000 de O Pino. Na categoría absoluta, os primeiros postos foron para Juan Álvarez e Zelinda Spencer.
Mañá xoves 21 de setembro remata o prazo de inscrición na Carreira pedestre popular do Pino que este domingo día 24 chega a súa décimo oitava edición. A participación pode formalizarse a través da web carreirasgalegas.com antes das 23.59 horas de mañá.
Ata o momento son case 300 as persoas que confirmaron a súa presenza nesta proba que chega a súa maioría de idade.
A saída da categoría absoluta (maiores de 18 anos) será ás 10.00 horas, e as seguintes iranse facendo de xeito consecutivo ata ás 12.10, cando comezarán a correr as persoas participantes menores de seis anos. Tanto a saía como a meta estarán situadas na praza de Forcarei (Arca). O percorrido é de 8 quilómetros para a categoría absoluta e duns 300 metros para menores de seis anos.
Organizada polo Concello do Pino baixo o control técnico da Federación Galega de Atletismo, esta proba pertence ao IX Circuíto de carreiras populares da Deputación da Coruña e poderán participar atletas federados e non federados, pero haberá unha soa clasificación conxunta. O control da proba estará a cargo do Comité de Xuíces da Federación Galega de Atletismo.
A recollida de dorsais será na secretaría técnica (situada na praza de Forcarei) 30 minutos antes da saída. O regulamento da proba pódese consultar na mesma paxina web da inscrición.
O Concello entregará trofeo para os tres primeiros e as tres primeiras clasificadas das diferentes categorías da carreira absoluta, e para o primeiro e a primeira atleta local das categorías Sub-8 ata Sub-18, entre outras premiacións. Haberá medallas para todas as persoas participantes nas categorías escolares entre Sub-6 e Sub-12. No caso dos clubs federados establécense premios en metálico de 150, 100 e 50 euros para os tres primeiros, tanto en categoría masculina como feminina.
