Gonzalo Trenor, delegado da Xunta de Galicia na Coruña, visitou a biblioteca do Pino acompañado polo alcalde, Manuel Taboada, e pola concelleira de Cultura, Eva Varela. Foto: Xunta
A Xunta de Galicia investirá un total de 18.718 euros na ampliación da área infantil da biblioteca do centro sociocultural Luis Seoane do Pino e na adquisición de materiais de novas tecnoloxías. Así o anunciou onte o delegado da Xunta na Coruña, Gonzalo Trenor, na súa visita á biblioteca municipal, na que estivo acompañado polo alcalde, Manuel Taboada, e pola concelleira de Cultura, Eva Varela.
Trenor destacou que este apoio encádrase na liña de axudas destinadas á mellora e equipamento das instalacións e locais dos concellos dirixidas a actividades culturais, por importe de 500.000 para toda Galicia e das que se beneficiarán 40 concellos. Segundo o delegado da Xunta na Coruña, a intención desta orde de subvencións da Consellería de Cultura, Educación e Universidades é “dotar dos medios necesarios ás entidades locais comprometidas coa acción cultural para que poidan executar as súas programacións, así como contar coas oportunas infraestruturas que lles permitan a adecuada realización das actividades culturais, garantindo o servizo público que prestan á cidadanía tanto nos eidos rurais como urbanos”.
Os concellos beneficiarios teñen que ser titulares dos locais culturais para os que se solicitan as axudas e contar cunha programación cultural estable ao longo do ano, como é no caso do Concello do Pino. A subvención destinarase á ampliación da área infantil da biblioteca, así como á adquisición de materiais técnicos vinculados ao desenvolvemento das accións culturais.
