Un axente da Garda Civil ofrece consellos para evitar ser vítimas de delitos, no marco do Plan Maior Seguridade do Ministerio do Interior // Aínda quedan prazas para participar nas reunións informativas que se celebrarán no Amenal e en Pastor
Un total de 30 veciños e veciñas da parroquia de Lardeiros, no municipio do Pino, encheron o local social onte, luns 6 de xuño, para asistir á primeira das charlas informativas do Plan Maior Seguridade, organizada polo Concello en colaboración coa Garda Civil e co Ministerio do Interior. O axente da Garda Civil Óscar Rey foi o encargado de facilitar consellos para evitar os problemas de seguridade que afectan ás persoas maiores como colectivo: os riscos no fogar ou na vía pública, estafas, roubos e furtos, accidentes e situacións de maltrato ou abandono.
En palabras de Óscar Rey, “Galicia é unha balsa de aceite comparada con outras comunidades, pero non estamos exentos de riscos e debemos tomar medidas de prevención”. O primeiro e máis importante ante un delito é, segundo o axente, non facerlle fronte ao malfeitor e chamar á Policía ou á Garda Civil, no teléfono de emerxencia 112 ou no 062.
No transcurso desta charla presencial proxectouse un vídeo do Plan Maior Seguridade, impulsado polo Ministerio do Interior e dirixido á prevención e mellora da seguridade das persoas maiores. Ademais, os asistentes compartiron as súas experiencias ou aqueles casos que lles aconteceron a familiares e coñecidos, aos que Rey respondeu ofrecendo indicacións de como se debe actuar.
Pola dispersión e o envellecemento da poboación que se dá no rural galego, o axente incidiu en puntos como non ter moitos cartos en efectivo na casa, pechar a porta do domicilio cando saímos á horta ou á casa dun veciño ou anotar as matrículas dos vehículos daquelas persoas que non coñecemos pero que nos parecen sospeitosas. Tomar nota do número de serie da maquinaria agrícola e das ferramentas ou usar unha marcaxe na maquinaria para identificala en caso de roubo foi outro dos consellos ofrecidos por Óscar Rey. Tamén salientou a utilidade das pulseiras ou reloxos con localizador GPS para aquelas persoas maiores que saen pasear e corren risco de perderse.
As charlas do Plan Maior Seguridade repetiranse nos vindeiros días noutras parroquias do Pino e aínda quedan prazas libres para asistir. Así, o xoves día 9 está previsto celebrar outra reunión informativa no Amenal e o luns 13 de xuño no local social de Pastor. Aquelas persoas interesadas en participar poden anotarse na casa da cultura ou chamando ao teléfono 981 511 065.
