Foron 17 os equipos dispostos a buscar lugares e resolver probas de lóxica e coñecemento // A proba desenvolveuse nesta ocasión na contorna de Ferreiros //
Ao redor de sesenta persoas, divididas en 17 equipos, participaron este sábado 11 de maio na terceira edición de O Pino Aventura, actividade ao aire libre que convida a coñecer a pé distintas paraxes naturais do Pino ao tempo que pon a proba os coñecementos, o inxenio e a habilidade dos participantes.
Co campo da igrexa de San Verísimo de Ferreiros como base, a misión dos equipos consistiu en atopar, coa axuda dun mapa, un total de dezaoito localizacións (máis outra oculta) espalladas pola contorna e resolver as probas que se lles propoñían nalgúns dos puntos, consistentes en enigmas relacionados coa lóxica, a literatura, o cinema ou a xeografía.
Ademais, as persoas participantes tamén tiveron que facer unha proba especial de habilidade e os menores puideron facerse con lambonadas e regaliños durante o percorrido.
Destacou a presenza de familias. Os equipos nos que se combinaban menores e persoas adultas foron maioría e tamén hai que subliñar a participaron de equipos chegados dende as catro provincias galegas, de lugares como Salceda de Caselas (Pontevedra) ou O Carballiño (Ourense). A proba cumpriu así o obxectivo de promocionar O Pino e atraer novos visitantes.
Precisamente coa fin de dar a coñecer distintas paraxes, cada ano vaise alternando o lugar no que se desenvolve O Pino Aventura: foi Arca na primeira edición, A Tarroeira o ano pasado e Ferreiros nesta, o que lle deu a oportunidade aos participantes de facer treitos do Camiño de Santiago, coincidindo cun bo número de peregrinos.
Uns petiscos rematado o tempo de competición, limitado a dúas horas e media, puxéronlle a guinda a unha xornada de exercicio, diversión e convivencia organizada coa axuda da empresa Territorio Comanche.
As clasificacións e as respostas das probas desta terceira edición de O Pino Aventura poden consultarse no arquivo adxunto.
