Belén do Campo destaca que con esta actuación tamén se mellora da seguridade viaria na zona ||
O alcalde destaca que esta estrutura ten un taboleiro de 7,2 metros de ancho e facilita o paso de dous vehículos ao mesmo tempo ||
O alcalde do Pino, Manuel Taboada, e a delegada da Xunta na Coruña, Belén do Campo, visitaron esta mañá a nova ponte sobre o río Noa en Domés, que mellora a seguridade viaria e a comunicación entre as parroquias de Lardeiros e Gonzar. A Xunta financiou esta obra cunha achega de máis de 120.000 euros a través do Plan de Infraestruturas Rurais 2025 (PIR).
A intervención consistiu na substitución dunha obra de drenaxe situada nun camiño municipal ao sur de Domés, que presentaba importantes deficiencias. A infraestrutura existente tiña capacidade insuficiente en épocas de enchente, o que provocaba asolagamentos nos terreos adxacentes. Ademais, o seu reducido ancho dificultaba o paso de vehículos e impedía o cruzamento entre eles, afectando á seguridade viaria e á funcionalidade da vía.
A nova estrutura executada é un pórtico de 6×3 metros cun ancho de taboleiro de 7,2 metros, mellorando de xeito significativo a capacidade hidráulica e as condicións de circulación neste punto. “Ademais de mellorar significativamente a seguridade viaria, agora poden cruzarse dous vehículos ao mesmo tempo pola ponte”, indicou Manuel Taboada, que agradeceu o apoio da Xunta para executar a obra.
O investimento total da actuación ascende a máis de 120.000 euros. Belén do Campo subliñou que co obxectivo da intervención foi “mellorar as comunicacións, reforzar a seguridade e dar resposta ás necesidades dos concellos do rural”.
Durante a visita, a delegada destacou a importancia deste tipo de actuacións para garantir infraestruturas máis seguras e adaptadas ás condicións climáticas actuais, ao tempo que reafirmou o compromiso da Xunta coa mellora continua das dotacións e servizos nos municipios da provincia.
No acto estiveron presentes o concelleiro de Medio Rural, Gerardo Pintor, e veciños e veciñas da zona.
