- Brilé, chapas e o xogo do pano son algúns dos favoritos da rapazada /
- As actividades están orientadas a un desenvolvemento tanto físico como intelectual e creativo /
- Nos vindeiros días o alumnado recorrerá un tramo do Camiño de Santiago /
A escola de verán do Pino acolle ao longo das súas seis quendas a máis de 150 nenas e nenos, unha axuda á conciliación laboral durante os meses de verán que só nas quendas de xullo recibe a 107 e 92 alumnos de entre 3 e 12 anos. Neste espazo a rapazada realiza actividades deportivas, xogos de estratexia, quebracabezas e manualidades durante o día, ademais de divertirse nun espazo seguro no que poden socializar libremente.
Con motivo de apoiar esta socialización e adaptar mellor as actividades, os grupos divídense por idades da seguinte maneira: 3 a 5, 6 a 8 e 9 a 12 anos. Nos tres casos, a rutina é similar: a primeira hora as monitoras dirixen unha actividade de ximnasia musicalizada, ben sendo aerobic ou baile a modo de quentamento, co fin de que o alumnado se active e comezar unha intensa xornada de xogos que só se deterá durante as pausas para a merenda e o almorzo.
O calendario é flexible, adaptándose ás necesidades da rapazada día a día. As diversas actividades funcionan a través dun sistema de incentivos en que participar en xogos ou gañar determinadas competicións outorga puntos, cos que logo se pode “pagar” por determinadas vantaxes como, mesmamente, elixir a actividade a realizar, aínda que hai dúas claras favoritas: brilé e carreiras. O fútbol tamén levanta paixóns, pero só entre unha parte do alumnado.
Ademais das actividades cotiás a Escola de Verán ten preparadas varias propostas especiais, sendo unha destas a andaina polo tramo do Camiño de Santiago que bordea o municipio, unha xincana de auga para suplir a excursión á piscina doutros anos e unhas olimpíadas en miniatura na que a rapazada deberá superar distintas probas deportivas para gañar.
A Escola de Verán está, así mesmo, preparada para atender nenos e nenas con necesidades especiais e posúe diversos protocolos de actuación especializados para adaptarse á diversidade funcional, tratando de ser un espazo integrador no que todas e todos poidan divertirse e desfrutar do verán ao máximo.
