A subvención permitirá financiar persoal técnico dos Servizos Sociais e persoal auxiliar do Servizo de Axuda no Fogar || A Deputación concede financiamento para 2.928 horas do SAF de libre concorrencia
O Concello do Pino recibirá unha achega de 66.992 euros da Deputación da Coruña para o financiamento dos Servizos Sociais Comunitarios Municipais durante o ano 2026. A subvención enmárcase no Programa FOPPSS, destinado a apoiar os concellos no mantemento e prestación destes servizos.
Do importe total concedido, 26.000 euros destinaranse ao financiamento de persoal técnico A1 dos Servizos Sociais municipais. Os 40.992 euros restantes corresponden ao persoal auxiliar do Servizo de Axuda no Fogar (SAF) de libre concorrencia, para o que a Deputación financia un total de 2.928 horas.
Esta achega contribúe a reforzar os recursos dos Servizos Sociais do Concello do Pino e a atención que se presta á veciñanza, especialmente a través do Servizo de Axuda no Fogar, que facilita apoio no domicilio ás persoas que precisan asistencia para desenvolver as actividades da vida diaria.
O financiamento da Deputación permite así dar continuidade aos recursos humanos necesarios para a prestación dos Servizos Sociais Comunitarios e favorecer unha atención próxima e adaptada ás necesidades da poboación.
