A Conselleira Beatriz Mato e o alcalde Manuel Taboada na sinatura do convenio
O alcalde de O Pino, Manuel Taboada Vigo, e a conselleira de Medio Ambiente e Ordenación do Territorio, Beatriz Mato, asinaron hoxe un convenio polo cal Augas de Galicia construirá no concello unha nova estación depuradora de augas residuais (EDAR). A instalación, que suporá un investimento de 2,1 millóns de euros, mellorará o servizo dos núcleos de Arca, Amenal, e, na parroquia de Castrofeito, a Pazo, Rial e Santiso.
O incremento de poboación experimentado nos últimos anos, e o crecemento de peregrinos e de negocios relacionados coa hostalería e o turismo no Camiño de Santiago fan que as actuais instalacións “se quedaran obsoletas”, segundo o alcalde. A nova depuradora “solucionará este problema e axudaranos a dar un mellor servizo á veciñanza e a preservar o medio natural”, engadiu Manuel Taboada.
Despois do acto de sinatura do convenio, Manuel Taboada agradeceulle á conselleira a axilidade coa que se tramitou o expediente para unha intervención moi importante para O Pino.
