Fabiola García Martínez desprazouse ata Pedrouzo para despedir o curso na rede pública autonómica da Galiña Azul ||
Estivo acompañada polo alcalde, Manuel Taboada, e o xerente do Consorcio Galego de Benestar ||
Ao centro de O Pino asistiron este curso 41 nenos e nenas ||
A partir de setembro todas as prazas das escolas infantís de Galicia serán gratuítas ||
As escolas infantís que pertencen a rede pública da Xunta de Galicia rematan o curso escolar esta semana. Con este motivo, a conselleira de Política Social e Xuventude, Fabiola García Martínez, desprazouse ata O Pino para entregarlle ao alumnado unha orla e fotos personalizadas que recibirán todos os nenos e nenas que acoden a rede da Galiña Azul.
Acompañada polo alcalde de O Pino, Manuel Taboada, e polo xerente do Consorcio Galego de Servizos de Igualdade e Benestar, Perfecto Rodríguez, Fabiola Martínez visitou as instalacións do centro e conversou con algúns dos 41 nenos e nenas que este curso están matriculados na Galiña Azul de O Pino.
Fabiola García desexoulles aos menores unhas boas vacacións e agradeceu ao persoal das escolas o traballo desenvolvido ao longo do curso e tamén ás nais e pais a súa confianza no proxecto educativo da Xunta. Ademais, salientou que as escolas infantís teñen demostrado ser un servizo de conciliación fundamental e tamén un lugar de aprendizaxe para os nenos.
Neste sentido, a conselleira sinalou que o Goberno galego quere garantir que as dificultades económicas non impidan a ningunha familia levar aos seus pequenos a unha escola infantil. Por iso, o vindeiro curso Galicia converterase na primeira Comunidade Autónoma en facer gratuítas todas as escolas de 0 a 3 anos, con independencia da súa titularidade.
Deste xeito, a partir de setembro en Galicia non se pagará nada pola atención educativa de 0 a 3 anos. Esta medida beneficiará a 30.000 familias e suporá un aforro de entre 1.500 e 2.000 euros por neno e ano.
