-
O auditorio da Casa da Cultura acollerá este venres a función de monicreques ‘Trogloditas’ //
-
O xoves 11 de novembro o grupo Ambar, formado por mulleres con diversidade funcional, poñerá en escena ‘M’ //
-
O Día contra a Violencia de Xénero, o alumnado asistirá á representación de ‘Feminíssimas’ //
O 25 de novembro, Día Internacional da eliminación da Violencia contra as mulleres, marcará o calendario cultural das próximas semanas no Concello do Pino con tres espectáculos de sensibilización dirixidos ao alumnado do colexio público Camiño de Santiago.
O primeiro dos espectáculos que chegará ao Pino será Trogloditas o vindeiro venres 29 de outubro. Tanxarina Teatro convidará aos escolares a entrar no primeiro teatro da prehistoria e, con moito humor e da man de monicreques, coñecer a forma de vida dos nosos antepasados. A función comezará ás 13.00 horas no centro sociocultural Luis Seoane.
O xoves 11 de novembro será a quenda de M, unha intervención artística que mestura texto, movemento, corpo e danza e que ten como protagonistas a mulleres con diversidade pertencentes ao ámbito rural. Dirixida por Helena Salgueiro, conta coa colaboración da Axencia de Desenvolvemento Rural (Agader) e nela participa o grupo de artes escénicas Ambar, formado por mulleres con diversidade funcional. O escenario volverá ser o auditorio da casa da cultura Luis Seoane e o inicio está previsto para as 15.45 horas.
E xa no 25N, rapazas e rapaces asistirán á representación de Feminíssimas da compañía viguesa De Ste Xeito Producións. Trátase dunha comedia na que tres amigas amosan as distintas formas que teñen de entender o feminismo. De novo, o auditorio Luis Seoane acollerá a obra, que principiará ás 13.00 horas.
